جسم حي وقلب ميت

جيت حلمٍ مختصر والليـل غافـي
لكن بسرعه صحا وانت اختفيـت
وقال يكفي قلت - لا - ماهو بكافي
لا ارتوى مني ولا منـه ارتويـت
قال حلـمٍ لا يشـوف ولا يِشافـي
قلت حسبي لذتـه لامـن غفيـت
وبعجل غطيت وجهي في لحافـي
بين - عل- يعود لي حلمي و ليت
كل ما حولي سكن والنور طافـي
وانتظر طيفك ,, ولكن مـا لفيـت
الامل قصّر معي واليـاس وافـي
ضمنى بركود وبحضنـه صحيـت
مارجعت !! ولي ظهر ماكان خافي
اثرك انت اللي عن احلامي جليت !
يا أعيِشك واقعٍ صعـب وخرافـي
فيه اجيك بجسم حي وقلب ميـت !
ياتبـدد روعـة الحلـم وتجافـي
وعذرك اني للمحبه ما ارتخيـت !
من صدق بالحب يرضيه الكفافـي
لكن بقـل المـوارد مـا رضيـت
اعترف بالشح وان كان اعترافـي
تحسبه - رجعه - تراني ما نويت
ودام ماقدمت لك مـا كـان كافـي
لو سقيتك كل عمري مـا رويـت
والختام ,, الود ما فيـه اختلافـي
ياعسا دربـك سمـاحٍ لا مشيـت

للشاعرة :: اسماء البراهيم