عروس الموت

لا وقعِ / لا صوت/ لا تأثير/ لا رفـه
هذا انطباعي و الألم / حيل يحوينـي
و الشوق ينضح و التجاويف ملتفـه
تخنق بقايا طيف ملفـاه فـي عينـي
اوزن حروفي و الأمل يِثقـل الكفـه
و اخفي دموعي عنه و الفرح ماليني
و اكتم جموحي و الثقل واجب العفـه
مهما نهل منـي الأضعـاف يعطينـي
حتى على الزلات ويـاه فـي صفـه
مقدر اعارض مصدرٍ حيـل يروينـي
ما مرني إحساس يقوى علـى نزفـه
لو يجرح ايامي و الآمـال و سنينـي
معه أول احلامي و الأشواق و الرجفه
و اول بشاير تسكب العشق ما بينـي
امنت عمري معه و اعطيتـه الدفـه
و كل حالـي عسـى قربـه يخلينـي
ظني وفيت و سرت بالملي ع الوصفه
و الناتـج اخطيـت لاشـي يعفينـي
و الحين مدري يا ترى تنفع الوقفـه
و الجرح بادي و الجنايـة بسكينـي
حتى القدر كفه يربـت علـى كفـه
من زود حزنه صار يصرخ و يبكيني
سلم كياني عنـه فـي ليلـة الزفـه
و انا عروس الموت و النور يغشيني
حتى جمود الكون من مقربـه ادفـه
اقلهـا لا انكشـف نزفـي يغطينـي
في ليله القارس يصحى و انا اغفـه
ياخذ علـى نفسـه و انـا يبدينـي


للشاعرة :: جنون الشعر